Тарихыбыз истәлекле вакыйгаларга бик бай. Быел 29 октябрьдә илебезнең киң җәмәгатьчелеге ВЛКСМ төзелүнең 100 еллыгын билгеләп үтәчәк. Статистика буенча, илнең 200 миллионнан артык егет һәм кызы комсомол мәктәбен узган. Һәр буынның яшьләре Ватан алдында торган зур һәм мөһим бурычларны хәл итүдә актив катнашкан, илебез тарихына искиткеч бай эчтәлекле елъязмалар язып калдырган. Әлеге истәлекләрне, тарихны бүгенге буын яшьләренә җиткерү, өлкән буын алдына торган бурычларыбызның берсе.Шул уңайдан, гимназиянең 9 нчы сыйныф укучылары белән, ветеран комсомол Гатауллин Роза Әсхат кызы катнашында “Комсомол нәрсә ул?”дип исемләнгән сыйныф сәгате үтте.Роза Асхатовна үзенең чыгышында бик күп кызыклы хатирәләрне исенә төшерде.Комсомоллар, кайда гына хезмәт куйсалар да, һәрвакыт алгы сызыкта, беренчеләр рәтендә булганнар. Комсомол оешмалары яшьләрне шәхес буларак тәрбияләп үстереп, аларга җәмгыятьтә үз урыннарын табарга булышкан.