Сугыш... Җир йөзендә һәр кешене дер селкеткән иң куркыныч сүз бу. Кемнәрнең генә үзәген өзмәгән дә, тормышын җимермәгән бу каһәр суккан афәт. Әгәр уйлап карасаң, шушы афәт тәрәзәсен чиртмәгән, ишеген какмаган бер генә гаилә дә юк бит. Миллионлаган кешеләрнең яшьлек елларын, балалык чорын, пар канатлы булып, тигез гаиләдә яшәүне урлаган бу кара еллар. Районыбызда бөек Җиңү уңаеннан төрле чаралар уздырыла. Шундый чараларның берсе, бүген, 4 нче май көнне, Сөббух Рафиков исемендәге үзәк китапханәдә үткәрелде. Дәһшәтле сугыш елларына багышланган кичәдә гимназиянең 7 нче сыйныф укучылары да катнашты. Чарага тыл ветераннары  чакырылган иде. Әнисе Сталинград блокадасында катнашкан Фәрхисорур апаның чыгышын балалар йотлыгып тыңладылар. Ул, күз яшьләренә буылып, әнисе язып калдырган истәлекләрне укыды. Очрашуда һәвәскәр җырчыларыбыз Гараева Тәслимә һәм Миннекәев Фәннурның үзләренең моңлы җырларын бүләк иттеләр. Әлеге кичә укучылар күңелендә озак сакланыр.