Сугыш ачысын кече яшьтән үк татырга туры килгәнгәме бу чор кешеләре бик мәрхәмәтле, изге күңеллеләр. Менә без, “Кояшкай” балалар бакчасы балалары белән, шундыйларның берсендә кунакта булдык.
Ул – кояшлы матур яз көнендә үзенең 90 яшьлек гомер бәйрәмен билгеләп үтүче – Кәмәрия апа Хәйруллина. Әнә ул каршыбызда без килүгә шатланыпмы, кояштай балкып утыра. Көләч йөзеннән, ягымлы күзләреннән сөйкемле, ниндидер эчке матурлык нуры балкып тора аның.
Гомер бәйрәме белән котларга килгән балалар аңа үзләренең матур җырларын, изге теләкләр теләп язган шигырьләрен бүләк иттеләр. Кәмәрия апа аларны тын да алмыйча, игътибар белән тыңлап утырды. Балачак хатирәләрен искә алгандыр мөгаен, күзендә яшь бөртекләре дә күренде.
- И-и, балалар, бәхетле булып үсегез, ходай сезне әти-әниегездән аермасын берүк. Тыныч тормышта яшәргә язсын балалар! – дип, Кәмәрия апа балаларга үзенең рәхмәтен, теләкләрен әйтте.