Шигърият күгендә иң якты йолдыз булып янучы бөек шагыйребез Габдулла Тукайның тормыш юлы һәм иҗаты белән балалар кече яшьтән таныша башлыйлар. Балалар бакчаларында әлеге юнәлештә зур эш башкарыла. Әлбәттә, әлеге зур чарада "Кояшкай" балалар бакчасы да читтә калмады,
Г.Тукайның туган көнен билгеләп үтте. Әлеге әдәби-музыкаль кичәне Кәҗә белән Сарык алып барды, аларның капчыгыннан Г. Тукайның әкият һәм шигырь китаплары табылды.
Балалар әдипнең "Гали белән Кәҗә", "Шаян песи", "Кызыклы шәкерт" шигырьләрен сөйләделәр, аның сүзләренә язылган җырларны җырладылар, "Шүрәле", " Су Анасы", "Кәҗә белән Сарык" әкиятләрен сәхнәләштерделәр, кунакка килгән әкият геройлары белән уйнадылар.
Г. Тукай үзенең иҗат җимешләре аша хезмәтне, табигатьне, кешеләрне яратырга; гадел, мәрхәмәтле булырга өйрәтә. Ә сабыйларыбызның аның әсәрләрен белүләре, кызыксынулары, татарча матур итеп сөйләүләре горурлык һәм якты хис уята.