Нәүрүз – язны каршылап, язгы чәчү эшләре алдыннан үткәрелә торган халык бәйрәме ул. Нәүрүз сүзе яңа көн (ел) дигәнне аңлата. Нәүрүз бәйрәме – ул игелек, дуслык бәйрәме. Бу гүзәл, язгы бәйрәм көнендә кешеләр бер-берсенә кунакка йөриләр, бер-берсенә булган үпкәләрен оныталар, җырлыйлар , бииләр, рәхәтләнеп күңел ачалар. Бу бәйрәмнең хуҗасы- Нәүрүзбикә.

"Кояшкай" балалар бакчасында Нәүрүз бәйрәме һәрелдагыча, бик күңелле үтте. Бәйрәмгә "Р.Ш. Фәрдиев исемендәге татар гимназиясенең" беренче сыйныф укучылары килде. Балалар бергәләп, татарча җырлар җырладылар, биеделәр, шигырьләр  сөйләделәр. Кыш бабайны еракка - салкын якка озаттылар. Яз кызы - Нәүрүзбикәне каршы алдылар. Нәүрүзбикә үзе белән җылы кояш алып килде. Кояш үзенең нурлары белән балаларга шатлык, сөенеч бүләк итте.