Без Татарстан җирендә яшибез. Татарстан-ул безнең Туган илебез, торган җиребез, туган йортыбыз. Туган җир һәр кешегә газиз, кадерле. Аның зифа каенлы урманнарын, көмеш сулы күлләрен, балык белән тулы киң елгаларын бик яратабыз. Татарстан табигате белән генә түгел, үзенең табигый байлыгы белән дә дан тота. Иң зур байлыгыбыз – ул «кара алтын». Республикабыз җире табигый газ, ташкүмер, торф, төзелеш материалларына да бай. Татарстан-бәйсез дәүләт. 1990 нчы елның 30 нчы августында Татарстанның мөстәкыйльлеге, бәйсезлеге хакында Декларация һәм 1992 нче елның 6 нчы ноябрендә Конституциябез кабул ителде, 1994 нче елның 15 нче февралендә Шартнамәгә кул куелды.

Туган җирем!

Матур таңнар Иленә

тиңлим аны.

Ул – минем Татарстаным,

Бар татарның Ватаны.

Татарстан җире- татар халкының борынгы, тарихи туган иле. Татарстанда якынча 4 миллион кеше, ул күп милләтле республика. Безнең халкыбыз киң күңелле, республикабызда 107 милләт вәкиле яши. Монда күп кенә башка милләтләр үзләренең икенче туган илләрен тапканнар. Татар халкы гасырлар дәвамында рус, чуаш, мари, башкорт, мардва, удмурд һәм башка халыклар белән туган җиребезне тагын да матурлау өчен хезмәт иткәннәр. Г. Тукай сүзләре белән әйткәндә,"тел лөгать, гадәт вә ахлак алмашып " яшәгәннәр. Татарлар башка милләт кешеләре бер гаилә кебек бергәләшеп эшлиләр, дус яшиләр.