Яшел Үзән шәһәренең 16 нчы аерым фәннәрне тирәнтен үзләштерү урта гомуми белем бирү мәктәбе администрациясе “СӘЛӘТ ЯШЕЛ ҮЗӘН КЛУБЫ”н “СӘМРУХ 2019” исемле республикакүләм сәләтле балалар һәм талантлы яшьләр премиясенә “Ел клубы” номинациясендә катнашуга тәкъдим итте: Мәртәбәле казыйлар безнең клубыбызны “СӘМРУХ 2019” премиясенең җиңүчесе дип билгеләделәр. Безгә «Сәмрух» сыны, диплом, партнерлардан бүләкләр һәм fund.selet.biz платформасында тупланган акчалата премия тапшырылды. - Без бу бәйгедә 2016 нчы елдан бирле катнашабыз, без өчләтә лауреат, - ди җитәкчебез Динә Сәлаймановна Садриева, - «Сәмрух» премиясе миңа бик күп уңай хис-кичерешләр бирде, эчемдәге үз-үземә ышану хисе артты. Клублар ярышындамы, Сәләт йортында жюри каршындамы - һәр очракта да син үз-үзеңне җиңәсең, куркулар әкренләп бетә, уйлаган идеяңны чынга ашырасың, һәм бу сиңа чынлап торып ошый башлый! Шул ук вакытта кимчелекләреңне күреп, үзеңне кайсы яктан үстерергә икәненә төшенәсең. Бугенге көндә клубта 32 бала, алар арасында 1, 9 лицей, 5 нче гимназия, 15 нче мәктәп укучылары да бар. Без клубка татарча яхшы белгән яки белергә омтылган балаларны алабыз . -Мәктәбебездә Сәләт клубы ачу – мәктәп тормышына яңа сулыш өрде,- ди мәктәп директоры Сәйфетдинов Рөстәм Равилевич. Клуб 2016 нчы елда ачылды, әмма аның рулендә Шәйхетдинов Тимерхан иде. Ул үзенең бөтен көчен, акылын клубны үстерүгә юнәлтте. Бүгенге көндә ул “Сәләт клублары” президенты. Без аның белән горурланабыз. Без Сәмрухта катнашып, күпме тәҗрибә җыйдык! Күпме хис-кичерешләр! Күпме яңа дуслар! «Сәмрух» премиясендә безне күреп, горур «Ел клубы» исемен бирүләре безнең өчен зур шатлык булды. “Сәмрух”үтте – хис-кичерешләр калды!