Укучыларның “Тау ягы: тарихы, мәдәнияте һәм рухи мирасы” исемендәге IV төбәкара эзләнү эшләре конференциясе Укучыларда фәнни-тикшеренү күнекмәләре формалаштыру, телебезгә, милли гореф-гадәтләребезгә, рухи байлыгыбызга мәхәббәт тәрбияләү, сәләтле балаларны ачыклау hәм аларның үсеше өчен шартлар тудыру, фәнни эзләнүләрдә иҗадилыкка омтылыш тәрбияләү максатыннан 2018 нче елның 10 нчы апрелендә мәктәбебездә “Тау ягы: тарихы, мәдәнияте һәм рухи мирасы” исемендәге укучыларның IV төбәкара эзләнү эшләре конференциясе узды. Әйтергә кирәк, мондый югары масштабтагы әлеге чара бездә дүртенче тапкыр үткәрелә. Конференция Татарстан Республикасы Мәгариф һәм фән министрлыгы, Казан федераль университеты, Бөтендөнья татар конгрессы Башкарма комитетының Яшел Үзән бүлекчәсе, Татарстан Республикасы Зеленодол муниципаль районы башкарма комитеты мәгариф идарәсе, Татарстан Республикасының Зеленодольск муниципаль районы «Аерым фәннәр тирәнтен өйрәнелә торган 16 нчы урта гомуми белем мәктәбе» муниципаль бюджет белем бирү учреждениесе җитәкчелегендә узды. Анда Республикабызның төрле районнарыннан килгән укучыларның 80 нән артык фәнни-тикшеренү эше тыңланылды. Жюри рәтендә Шиһабетдин Мәрҗани институты галимнәре Садыйков Шамил Фәнис улы, Зиннәтуллина Алсу Әнвәр кызы, Бөтендөнья татар конгрессы Башкарма комитетының Яшел Үзән бүлекчәсе җитәкчесе Мирхәйдәрова Әлфия Хәбир кызы, Татарстанның атказанган укытучысы, Каюм Насыйри, М. Ломоносов премияләре лауреаты Садриев Әхәт Шәйхиевич һәм башка тәҗрибәле мөгаллимнәр иде. Янгыраган барлык фәнни эшләр һәм докладлар бик актуаль һәм кызыклы булды. Һәрбер чыгыш җанлы әңгәмә, дискуссия, фикер алышу белән үрелеп барды.