9 нчы декабрь көнне мәктәбебезнең 20 еллык юбилей тантанасы үткәрелде. Тантанага ветеран укытучылар, мәктәбебездә төрле елларда укытып – эшләп киткән укытучылар, хезмәткәрләр, шушы 20 ел эчендә мәктәпне тәмамлаган чыгарылыш сыйныф укучылары һәм бик күп кунаклар чакырылды. Очрашуга килүчеләр башта мәктәп, музей белән таныштылар, үзләрен укыткан укытучылары, классташлары белән очрашып мәктәп елларын искә төшерделәр.

Бәйрәм чыгарылыш укучыбыз Низамов Марат Рафаэлевич җитәкчелегендәге “Хыял” ансамбле чыгышы белән башланып китте. “Үткәнен белмәгәннең киләчәге юк” , - диләр. Шуңа да кичәне алып баручылар Шәйхетдинов Тимерхан һәм Хабибуллина Алсу мәктәп тарихы турында мәгълүмат биреп киттеләр.

Сәхнәдә шушы 20 ел эчендә эшләгән директорлар – Чибинова Н.Ш., Газеева А.С. котлады. Кичә җырлы-биюле концерт номерлары белән үрелеп барды. Гадәттәгечә,

мәктәпнең туган көнендә “Ел укытучысы” һәм “Ел укучысы” бәйгесенә нәтиҗә ясалды.

Кичәне йомгаклап, сәхнәгә мәктәбебезне тәмамлаучы укучылар, укытучылар коллективы күтәрелде. Йомгаклау өчен сүз мәктәбебез директоры, мәктәп өчен янып-көеп йөрүче, Сәйфетдинов Рөстәм Равил улына бирелде. Ул барлык кунакларны бәйрәм белән котлады, укытучылар коллективына мактаулы грамоталар тапшырды, барлык чыгарылыш сыйныф укучыларына зур рәхмәтен белдерде. Сәхнә алкышларга күмелде.