Җыр-биюләр, татар халкының гасырлардан килгән күңелле җор теле аша бик урынлы кулланылган уен-көлкеле сүзләр байлыгы ифрат дәрәҗәдә мул итеп сибелгән тамашалы романтик драма барыбызның да күңеленә хуш килде. Әсәрнең исеменнән үк аңлашылганча, әсәр яшьләр, алар арасындгы мөнәсәбәтләр турында. Яшьлек һәм мәхәббәт – татар драматургиясендә мәңгелек темаларның берсе, ул беркайчан да үз актуальлеген югалтмый, һәм олылар, һәм яшьләр өчен якын һәм кызыклы булып кала. Сәхнәдә яшь артистлар (Гөлчәчәк Гайфетдинова, Илнур Закиров, Гүзәл Минакова, Нәфисә Хәйруллина, Раил Шәмсуаров) белән бергә Әсхәт Хисмәт, Наилә Гәрәева, Венера Шакир, Мансур Ибраһим, Фәнис Җиһанша, Минвәли Габдуллин, Илтөзәр Мөхәммәтгалиев кебек өлкән һәм урта буын артистларының булуы тамашачыны шатландырды.