Сәләмәт кеше тормышны ярата. Сәламәт кеше бик сирәк кенә бәхетсез була. Бәхет исә безенең үз тәнебезгә күрсәткән кайгыртучанлыкка бәйле. Тән гармониясе булганда, җан тантана итә. Акылның зирәклеге дә ныклы физик нигезсез була алмый. Шуларны истә тотып, “Шатлыклы, лаеклы тормыш өчен көрәштә һәркем сәламәт һәм күтәренке рухлы булырга тиеш” девизы астында 5 апрель көнне мәктәбебезнең һәр сыйныфында “Сәламәт тәндә – сәламәт акыл” тематикасына караган бердәм сыйныф сәгатьләре узды. Класс сәгатьләрендә  укучыларның сәламәтлеген ныгытуда, саклауда ярдәм итүче чаралар турында сөйләшү алып барылды, көндәлек режимның, санитария-гигиена кагыйдәләрен  үтәүнең, дөрес туклануның  әһәмияте күрсәтелде. Мәкальләрнең мәгънәләрен ачыклау, сәламәтлек программасы төзү барышында укучылар саулыкның зур байлык икәнлегенә төшенделәр.