Бүген мәктәп спорт мәйданчыгында  балалар  сабантуе үткәрелде. Анда балалар  төрле ярышларда катнаштылар.  Кашыкка йомырка куеп йөгерү, чиләктән кашык белән су ташу, капчык киеп йөгерү. чүлмәк вату кебек уеннар уйнатылды. Соңыннан ике командага бүленеп укучылар  футбол уйнадылар.  Һәр укучыга да тәмле күчтәнәчләр өләшенде. 

Администрация.

Бүген 9 нчы сыйныф укучылары рус теленнән төп дәүләт имтиханы эшләделәр.

Администрация.

Бүген мәктәбебездә шатлыклы да, сагышлы да булган соңгы кыңгырау бәйрәме узды.“Соңгы кыңгырау” тантанасы барлык укучыларның, бигрәк тә чыгарылыш сыйныф укучылырының хәтеренә сеңеп калырлык эчтәлекле, үзенчәлекле итеп оештырылган иде. Чыгарылыш укучылары җырладылар да, биеделәр дә, вальс та әйләнделәр.  Борһанов Раил һәм мәктәпнең өмете, беренче сыйныфны тәмамлаучы  Сиринә Самитова укучылар сафлары буенча  кыңгырау чыңлатып уздылар. Шулай итеп, мәктәптә бу уку елының соңгы кыңгыравы 9 нчы һәм 1 нче сыйныфлар өчен чыңлады.  Ә чыгарылыш сыйныф  укучылары өчен урак өсте – дәүләт имтиханнары башланды. 

Администрация.

Бүген мәктәптә "Татар егете- 2018" бәйгесе булып узды. Бәйгедә  2-9 нчы сыйныф  егетләре катнашты.  Алар бәйгедә  үзләре белән таныштырырга,  татар халкының милли йолалары һәм бәйрәмнәре,  татар ир-атларының киемнәре турында  сөйләргә, һөнәрләрен (җыр, бию, шигырь),  отжимание ясау буенча осталыкларын  күрсәтергә тиеш иделәр.  Һәр катнашучы  төрле исемдәге  диплом белән бүләкләнде.   Ә "Татар егете-2018"  исеменә 3 нче сыйныф укучысы Зиганшин Фирзәр лаек дип табылды.  Афәрин!!!!  Киләчәктә дә уңышлар сезгә укучылар.

Администрация.

19 май – пионер туган көн. Ул 1922 елдан билгеләп үтелә. Советлар Союзы таркалганнан соң, ул бәйрәм итүдән тукталып тора.  Безнең  мәктәптә Пионер туган көнен билгеләп үтү традиция буенча ел да  дәвам итә.  Быел да  укучылар һәм укытучылар  табигать кочагында  ял иттек. Тәмле ризыклар ашадык  Спорт, хәрәкәтле уеннар  уйнадык.  

Администрация.

Бүген мәктәп яны тәҗрибә участогына суган утырттык, кишер, кызыл чөгендер, суган орлыгы чәчтек.  

1941 нче елда башланган Бөек Ватан сугышы 1945 нче елның 9 нчы Маенда гына тәмамлана. Нәкъ шушы көнне Германия капитуляция актына кул куя. Бу СССР тарихында булган иң сөенечле көннәрнең берсе була. Кешеләр җиңү шатлыгыннан урамга агыла. Әлеге көнне хәтта бер-берсен белмәгән, бер-берсе белән таныш булмаганнар да кочаклаша, күрешә, бәйрәм белән котлаша. 9нчы Май кичендә Мәскәү шәһәрендә моңарчы күрелмәгән салют ясала. Шушы вакыттан 9нчы Май дәүләт бәйрәме һәм ял көне дип игълан ителә.

Бүген мәктәбебездә "Үлемсез полк" акциясе узды. Әлеге чарада Бөек Ватан сугышы елларының ачысын-төчесен татып, Җиңү көнендә исә шатлык хисләре белән янган, тик кызганычка каршы, инде вафат булган Бөек Ватан сугышы ветераннарының балалалары, оныклары, оныкчыклары катнашты. Алар әби-бабайларының фотоларын күтәреп, әлеге “Үлемсез полк”ка кушылып авыл буйлап горур атлады...

Бөек Ватан сугышы тәмамлануга быел 73 ел тула. Җиңү бәйрәмнәре тагын шаулап узар. Ләкин, кешеләр йөрәгендә сугыш калдырган яра-җәрәхәтләр һаман да сыкрый. Йөрәк яраларыбыздан һаман да кан саркып тора.Сөекле улларын, яраткан ирләрен югалткан аналарның, хатыннарның, ятим калган балаларның кайгы-хәсрәте мәңге онытылмас, алар йөрәгендә сугыш калдырган яра мәңге төзәләсе түгел. Алар сугышны шулай каһәрләп искә алачаклар. Сугыштан әйләнеп кайта алмаган солдатларны 1 минут тынлык белән искә алыдык. Тыл ветераннарын һәм сугыш чоры балаларын Акъегет җирле үзидарә башлыгы Сәлиҗан Рифкат улы Шамсиев Бөек Җиңү  көне белән котлады. Аларга  президентыбыз Рөстәм Миңнеханов һәм Яшел Үзән муниципаль районы башлыгы Александр Тыгин  юллаган котлау открыткалары таратылды. Шулай ук мәктәбебез директоры Ләйлә Равил кызы Гаязиева  бәйрәмгә килгән хөрмәтле кунакларыбызны Җиңү көне белән котлады. Бәйрәм концертын  караганнан соң кунакларыбыз чәй табанына рәхим иттеләр. 

Бүген 9 нчы сыйныф укучылары Норлат урта белем бирү мәктәбендә  математикадан сынап карау имтиханы тапшырдылар.