Көннәр язга авышкан мәлдә Нәүрүз бәйрәмен үткәрү – матур гадәт. Кешеләр элек-электән язны көтеп алганнар, аңа яңа өметләр баглаганнар. Бер-берсенә изге теләкләр теләп, елның яхшы килүенә, уңыш күп булуга юраганнар.

      Безнең мәктәптә   дә узды  “Нәүрүз” бәйрәме.  Нәүрүзгә багышлап театрлаштырылган тамаша әзерләдек. Тамашада төрле персонажлар –  Кыш бабай, Яз һәм Кояш, Көн һәм Төн катнашты. Бәйрәмнең төп герое – Нәүрүзбикәне (Әдилә Шакирова) олылап, кул чабып каршы алдык. Шуннан соң төрле уеннар уйнадык, җырлар җырладык, биюләр биедек. Рәхәтләнеп Кыш бабай, Нәүрүзбикә белән күңел ачтык. Мәктәп алдында җыр- моң, уен-көлке яңгырап торды. Кыш бабайның (Фәхеретдинова Зилә Мәүзил кызы) Нәүрүзбикәгә тиз генә бирешәсе килмәде. Аның белән көч сынашты. Аркан да тартыштылар, йомырка кабып та йөгерделәр. Бәйрәм ахырында  төрле тәмле ризыклар белән чәй эчтек. Бәйрәм бик җанлы һәм матур узды. Бәйрәмгә авыл халкы да, әти-әниләр дә бик күп җыелды.