Билгеләнгән юнәлештә мәктәптә 3 март көнне укучыларның телдән журналы үтте. Анда 8 сыйныф укучылары Резедә Мөдәрис кызы белән берлектә районыбыз оешу тарихы, аның структурасы, гербы һәм флагы, җитәкчеләре турында сөйләделәр.  Сөйләнгәннәргә нигезләнеп, 4 мартта 8-9 сыйныфларда районның социаль-икътисади хәле белән таныштырдык.  Ютазы районы территориясендә эшләп килүче предприятиеләр, аларның бүгенге көнгә торышы,  алдынгы карашлы җитәкчеләре турында җентекле мәгълүмат  тапшырырга тырыштык. Шулардан чыгып, перспетивалы һөнәрләр, төбәк сәнәгатен күтәрү өчен үзебездән кертә ала торган көчне прогнозлап карадык.  Предприятиеләрне фотосурәтләр аша  тану мөмкинлеге булды. Укучыларга район башлыгы отчеты нигезендә сәнәгать оешмаларының бюджетка керткән суммаларын күзәтеп, арадан лидерларны билгеләдек. Халыкның тормыш-көнкүреше дәрәҗәсенә керем ягыннан, хезмәт белән тәэмин ителү ягыннан бәя бирдек.

Социаль өлкәдә хезмәт күрсәтүче предприятиеләр турында сөйләдек.  Авыл хуҗалыгы өлкәсенең әле хәл ителәсе күп проблемалары барлыгы турында сүз булды.

Материал укучыларда кызыксыну уятты. Аларның предприятиеләрдә экскурсиягә бару, танышу теләге уянды.