16 нчы апрель көнне 7А сыйныф укучылары сыйныф җитәкчеләре Галиуллина Диләрә Әхмәдулла кызы белән бергә Габдулла Тукай музеена бардылар. Музейда иркен экспозиция заллары һәм 2 күргәзмә залы, шулай ук лекция залы урнашкан. Музейның экспозициясе шагыйрь тормышының һәм иҗатының төрле чорлары турында сөйли: • Балачагы • Җаек чоры • Казан чоры • Сәяхәтләре Шулай ук XIX – XX гасырлар чигендәге Казанның (бигрәк тә музей урнашкан Иске Татар бистәсенең) тормышын күзалларга мөмкинлек бирүче экспонатлар да бар. Аларның күбесен Милли музей фондлары һәм истәлек әйберләре тәшкил итә. Музейда шагыйрьнең фотоархивын, Тукай язышкан гәҗит һәм журналларның төп нөсхәләрен, төрле телләрдә чыккан әсәрләрен күрергә була. Аерым игътибарга лаек – Тукайның шәхси әйберләре: фаянс котыйчык (шкатулка) – апасына беренче кул хакыннан алган бүләге; кара бәрхет түбәтәй; каләм савыты (Санк – Петербургтан 1912нче елда алып кайткан булган); шагыйрьнең юл кәрҗине; күлмәк запонкалары(көмештән) – дусларының бүләге; шагыйрьнең вафатыннан соң алынган йөз маскасы. Укучыларга музей бик ошады. Татар халкының бөек шагыйре Габдулла Тукайның иҗатын тулырак өйрәнү өчен үз күзләрең белән барып күрү, укучыларда җылы тәэсирләр калдырды.