Табигать – шушы 8 хәрефтән торган сүз безнең өчен бик якын, бик тә кадерле. Табигать  безнең байлыгыбыз, эчәр суыбыз, ризыгыбыз.  Табигатьтән илһам алабыз, табигатькә чыгып күңелләребезне тынычландырабыз.

 Язгы, җәйге, көзге, кышкы табигатьме – адәм баласына  барысы да якын.

   Язгы табигать кеше күңелен яшәртеп җибәрсә, кышкы табигать үзенең кар бураннары белән күңелне җилкендерә, көзге табигать үзенең сары яфраклары белән сагышландыра, ә җәй безне яңадан яшәртә,күңелне күтәрә, еракларга чакыра.

Урманнар, кырлар, чишмәләр, елга – күлләр барысы да Табигать – ана  бүләкләре.  Без, кешеләр, кайвакыт  шуны онытабыз, елга күлләребезне пычратабыз, агачларны сындырабыз, кошларны, җәнлекләрне үтерәбез, табигатькә күпме зыян  салабыз.

     Әйдәгез, дусларым, булган матурлыгыбызны югалтмыйк, чишмәләребез кипмәсен, кошларыбыз җыры тынмасын, сулар һавабыз чиста, саф булсын!

                       Галиуллина  Диләрә Әхмәдулла кызы

 татар теле һәм әдәбияты укытучысы