Бөтендөнья татар конгрессы тарафыннан 2026 нчы ел татар дөньясы өчен Габдулла Тукай елы дип игьлан ителде. Шул уңайдан агымдагы елның 24-26 нчы апрель көннәрендә унберенче тапкыр уздырылучы Дөньякүләм "Татарча диктант" белем тикшерү акциясе бөек шагыйребез Габдулла Тукайның 140 еллыгына багышланды. Без дә бу акциядән читтә калмадык, 24 нче апрель көнне "Татарча диктант" акциясендә катнаштык. Акциянең төп максаты – татар телен саклау, аны куллану даирәсен киңәйтү һәм яшь буында телгә карата кызыксыну уяту. Мондый чаралар ана теленә карата җаваплылыкны арттыруга, шулай ук мәдәни мирасны саклауга зур өлеш кертә. Тукай иҗаты татар әдәбиятының җәүһәре булып тора, шуңа күрә чараның нәкъ менә аның истәлегенә багышлануы аерым мәгънәгә ия.
Диктант тексты Габдулла Тукайның "Бәхет" чәчмә әсәреннән алынган иде. Диктантны 98 нче татар-рус урта гомуми белем бирү мәктәбенең югары категорияле татар теле һәм әдәбияты укытучысы Касыймова Гөлнур Наил кызы яздырды. Һәркем үзенең грамоталык дәрәҗәсен, үз туган телен ни дәрәҗәдә белүен бәяләде. Чара татар халкының гимнына әйләнгән "Туган тел" җыры белән тәмамланды.