Барыбызга да билгеле булганча, апрель ае-бөек шагыйребез Габдулла Тукай ае. Чөнки бу айда бөек шагыйребез Габдулла Тукай туган һәм кызганычка каршы 27 яшендә вафат булган. Шушы кыска гына вакыт эчендә ул бик күп шигырьләр, әкиятләр язарга өлгергән. Быел шагыйребезнең 140 еллыгына багышлап. апрель аенда мәктәп, район, шәһәр, республика, Рәсәй, халыкара күләмдә бик күп төрле кичәләр, бәйгеләр үткәрелә. Бу бәйгеләрдә без дә читтә калмыйбыз. Мәктәбебезнең 6Б сыйныфы укучысы Исхаков Ильяс "Күңелебездә, телебездә, йөрәкләрдә Тукай мәңгелек" дигән конкурста район күләмендә 1 урын, шәһәр күләмендә лауреат булды. Ә бүген, ягьни 8 апрель көнне республика күләмендәге "Казан Федераль Университеты" Филология һәм мәдәниятара багланышлар институты үткәргән " Кузгатмакчы булсаң халык күңелләрен" дигән яшьләр фәнни -иҗади конкурсының " Без-Тукайлы халык" номинациясендә 2 нче дәрәҗә диплом белән бүләкләнде.
16 нчы апрель көнне Дәрдмәнд исемендәге Татар мәдәнияте үзәгендә VII нче Бөтенроссия шигырь сөйләүчеләр конкурсына йомгак ясалачак . Ильяс тантанага чакыру кәгазен алды инде. Анда аңа җиңүче дипломы тапшырылачак. Һәрбер шигырьне җиренә җиткереп сөйләүче, җаны-тәне белән татар телен һәм әдәбиятын, мәдәниятын һәм гореф-гадәтләрен яратучы Ильясыбызны чын күңелдән уңышлары белән тәбрик итәбез. Тырышлык, үҗәтлек, туган телне ярату аркасында гына югары дәрәҗәләргә ирешеп була! Афәрин, Ильяс! Уңышлар юлдаш булсын сиңа!