Кадерле дусларыбыз! 15-21 нче февраль аралыгында мәктәбебездә туган телебез- татар теленә багышланган атналык үткәрелде. 15 нче февральдә, барыбызга да билгеле булганча, бөек патриот шагыйребез Муса Җәлилнең туган көне билгеләп үтелде. Мәктәбебезнең милли эшләр буенча директор урынбасары Игтисамова Ландыш Илгизаровна һәм татар теле һәм һәм әдәбияты укытучысы Касыймова Гөлнур Наиловна, шулай ук мәктәбебезнең китапханә мөдире Хамидуллина Рузалия Минатуловна шагыйребезнең бөеклеген, аның биографиясенең һәм иҗатының нинди катлаулы булуын укучыларга бөтен нечкәлекләре белән җиткерделәр. Укучыларыбыз шагыйребезнең шигырьләрен яттан сөйләделәр, рәсемнәр ясадылар, җырларын җырладылар. 
Атна буена төрле викториналар, кичәләр, конкурслар үткәрелде. Укучылар татар теле атналыгында бик теләп катнашты. 
Туган телебез атналыгы 21 нче февраль – Туган телләр һәм халыклар бердәмлеге көне белән тәмамланды. Укучылар үз туган телләрендә шигырьләр сөйләделәр, җырлар җырладылар, биюләр биеделәр, туган тел турындагы мәкальләрне искә төшерделәр. Туган телебез һәркем өчен кадерле булуына ышандырдылар. Әйе, шулай шул, "Туган телем-татлы телем" дип, туган телебезгә соклану хисе белән тикмәгә генә әйтмибез. Һәркем үз туган теле белән горурлансын һәм аны яратып яшәсен иде!!!

югары категорияле татар теле һәм әдәбияты укытучысы
Касыймова Гөлнур Наил кызы