Мәктәбебездә, Халыкара туган тел көнен каршылап, ай буе төрле чаралар үтә. Әлеге чараларда беренче сыйныфтан алып 11 нче сыйныф укучыларына кадәр катнашалар. Иң беренче итеп, туган телгә багышланган плакатлар элдек. Анда бөек язучыларыбызның, мәгърифәтчеләребезнең цитаталары, тел турында язып калдырган әйтемнәре, халык мәкальләре язылган. Тәнәфесләрдә “Тәфтиләү”, “Туган тел”, “Сарман” көйләре яңгырап тора. Зур залда театральләштерелгән уеннар, рәсем конкурслары үткәрелде. Ә китапханәдә “Туган телем – иркә гөлем” исемле күргәзмә, викторина булып узды.

2,4 һәм 5нче сыйныф укучылары белән лингвистик КВН үткәрдек. Мәкаль, табышмак, тизәйткеч ярышлары булды. Шулай ук балалар үзләре язган шигырьләрен сөйләп безне шатландырдылар; җыр буенча ярыш, “Кем күпме фразеологик сүзтезмәләр белә?” кебек бәйгеләр уздырылды. 8 нче сыйныф укучысы Маслов Дамир Шәйхи Маннурның “Яхшы бел” шигырен сәнгатьле итеп сөйләде. Нәби Дәүлинең “Сорау” шигырен 3нче сыйныф укучысы Сурабов Әзиз, Әхмәт Ерикәйнең “Ике канат” исемле шигырен Касыймов Сәлим күңелләргә җиткерде. Соңыннан барыбыз бергә Габдулла Тукайның “Туган тел”ен җырладык.

Йомгаклап шуны әйтәсе килә: мондый чаралар укучыларның сөйләм һәм язу культурасын үстерә, тел күренешләрен аңлы рәвештә үзләштерүгә ярдәм итә.