18 нче апрель бакчабызда “Иң милли тәрбияче-2025” республикакүләм бәйгесенең йомгаклау өлеше узды. Әлеге бәйгене бишенче ел рәттән Габдулла Тукай исемендәге «Арча педагогика көллияте», Биектау муниципаль районы башкарма комитетының мәгариф бүлеге муниципаль казна учреждениесе белән берлектә оештырабыз.
Бәйге татар телендә белем бирүче педагогларның һөнәри осталыкларын үстерү, алдынгы эш тәҗрибәсен тарату максатыннан оештырыла. Бәйгегә барлыгы 260 гариза кабул ителде, шулар арасыннан “Милли белем һәм тәрбия бирүдә яңа инновацион технологияләрне иң оста файдаланучы тәрбияче”, “Татар телендә белем бирүче иң яхшы шөгыль”, “Милли рухлы шөгель“, Милли калоритлы мастер-класс”, “Иҗади остаханә”, “Милли колоритлы дидактик уен” “Иң яхшы милли бәйрәм”, “Иҗади номер”, “Татарча иң яхшы дидактик уен” номинацияләренә эшләр килде. Барлык җибәрелгән эшләр оештыру комиссиясе тарафыннан тикшерелеп, урыннар билгеләнде.
Бу көнне бакчабызга кунак булып Арча, Саба, Балтач, Теләче, Питрәч, Биектау районнарыннан җиңүчеләр җыелды. Алар “Иң милли тәрбияче” гран – прие өчен көч сынашты.
Бәйгенең мөхтәрәм кунаклары Мәгарифне үстерү институтының татар теле һәм әдәбияты кафедрасы мөдире, филология фәннәре кандидаты, доцент Шәмсетдинова Рәсимә Равил кызы, мәгарифне үстерү институтының мәктәпкәчә һәм башлангыч белем бирү кафедрасының өлкән укытучысы – Мифтахетдинова Надия Равил кызы, Г. Тукай исемендәге Арча педагогия көллиятенең татар теле һәм әдәбияты укытучысы – Төхвәтуллина Әлфия Госман кызы бәйрәмгә тагын да ямь өстәделәр.
“Иң милли тәрбияче” бәйгесенә килүче педагоглар балаларга милли белем һәм тәрбия бирү, патриотик тәрбия бирү кыйммәтләренә нигезләнгән чыгышлары белән белән үзләрен күрсәттеләр, лаеклы чыгыш ясадылар . Республикабызның төрле районнарыннан җыелган тәрбиячеләр арасыннан гран – прига Биектау муниципаль районы Чыршы “Салават күпере” балалар бакчасы тәрбиячесе Галиуллина Алсу Мөнир кызы лаек булды. Алсу Мөнир кызына иҗади уңышлар, тагын да биек үсешләр телибез!