Әни! Әни җирдә иң кадерле кеше.

Әниләрнең белик кадерен

Җил – давылдан саклап үстергән ул

Кызганмыйча бөтен гомерен.

Аның  киңәшләре көч-дәрт өсти,

Илхам бирә миңа яшәргә.

Бәхет – шатлык белән һәрчак язсын

« Әни» диеп аңа дәшәргә.

    Бүген кадерле әниләребезнең якты, илахи зур бәйрәме. Җир йөзендә әнидән дә якын, әнидән дә рәхимле,  мәхәбәтле, әнидән дә олы җанлы зат юктыр.

     Бүгенге кичәбезне дә без «Бишек җыры көйләп үстерик» дип атадык.

    Гаиләгә шатлык,өмет һәм куанычлар өстәп, бала дөньяга килә. Әлбәттә куаныч белән бергә, мәшәкатьләр дә өстәлә. Бәбине гел карап,тәрбияләп үстерәсе була. Ул борчыла да, елап та ала. Менә шул чакта әниләребез бишек җырларын көйләп, җырлар җырлап йоклаталар, юаталар.        Халкыбызда бишек җырлары борын-борын заманнарда ук барлыкка килгән. Балалар сөйли белмәсә дә,шул авазларны тыңлап юанганнар, һәм йокыга талганнар.

   Уртанчылар катнаш төркеме балалары үзләренең газиз, бердәнбер әниләрен бәйрәм белән котлап матур җырларын, биюләрен, шигырьләрен бүләк иттеләр.

Шулай ук кичәдә “Гаиләмнең бишек җырлары” бәйгесендә катнашып , лаеклы урын яулаган әниләр һәм дәү әниләрне дә чакырган идек. Алар да үзләренең бишек җырларын безгә бүләк итеп , бәйрәмебезне ямьләндерделәр.

     Кадерле Әниләребез! Без сез әниләр көне белән тәбриклибез! Сезгә исәнлек-саулык,балаларыгызның игелеген күреп,тыныч,мул тормышларда ,куанып-шатлып ,кайгы-хәсрәт күрмичә яшәвегезне телибез.