Бәйрәм мәктәпкә әзерлек төркеменең Алия Хәмзинаның “Әниемә” исемле  җыры астына биюләре белән башланып китте. Бу бию әниләр күңеленә шул дәрәҗәдә үтеп керде ки, хаттә әниләрнең күзләрендә яшьләр күренде. Бәйрәм балаларның җырлары, биюләре, матур матур шигырьләре белән  үрелеп барды. Әниләр дә бәйрәмдә бик актив катнаштылар. Үзләренең уңганлыкларын, осталыкларын күрсәттеләр. Уенда ике команда ярышты. Алар “Мультфильмны таны», “Бу өзек кайсы әкияттән”, “Бу көй нинди әкият героена туры килә”, рус бизләреннән ясалган пазлны җый  кебек уеннарда катнашып, урыннар яуладылар. Шулай ук, әниләребез, әбиләребез үзләренең нинди кул эшләренә оста булганлыкларын да күрсәттеләр. Татар халык бизәгеннән иңгә кую өчен брошка ясадылар. Ә залда утыручы әниләр төрле конкурсларда катнашып, үз командаларына баллар эшләргә ярдәм иттеләр. Ял вакытында, нәни сүз осталарыбыз әниләрен, әби-апаларын, дәү әниләрен котлап чыгыш ясадылар. Балаларның шигырьләре һәм җырлары  җаннарны җылытырлык итеп яңгырады,    дәртле биюләр башкарылды.  Балалар башкарган халык биюләре һәм җырлары кунакларның күңелләренә бигрәк тә хуш килде. Һәр чыгышны алкышлап  каршы алдылар.

Бәйрәмебезне йомгаклап, балалар “ Наступает праздник наших мам ” җыры белән тәмамлап, рәхмәт йөзеннән әниләренә бүләкләр тапшырдылар.