Фестивальнең максаты - милли рух, тарихи мираска сакчыл караш тәрбияләү, балаларда татар язучылары, драматургларының әсәрләренә кызыксыну уяту, театр сәнгатенә игътибарны юнәлтү, балаларның сәләтләрен ачыклау һәм үстерү. Әлеге фестиваль Биектау районы хакимияте, һәм мәгариф бүлеге, "Биектау" җирлеге, АО "Татмедиа", театраль сәхнә һәм балалар өчен чыгучы "Салават күпере" журналы редакцияләре тарафыннан оештырылды. Быелгы фестивальдә безнең "Тургай" балалар бакчасы якташ язучыбыз Рафис Корбанның "Керпе малае дуслар эзли" спектакле белән катнашып, беренче урынны яулады. Бу көнне балалар спектакльне мәдәният йорты сәхнәсендә тамашачыларга күрсәттеләр. Җиңүчеләргә Зиннур Хөснияр дипломнар һәм рәхмәт хатлары тапшырды. Кечкенә артистларыбызны һәм аларның җитәкчеләрен бу зур җиңүләре белән ихлас күңелдән  котлыйбыз!