Бүген, 18 ноябрь көнне  Шәтке урта мәктәбендә энергияне эффектив куллану буенча  8-11 сыйныфларда класс сәгатьләре  булып үтте.

Әлеге дәрес өйләрдә төрле энергия чыганакларыннан ничек дөрес файдалану һәм экономия ясау буенча белем һәм күнекмәләр формалаштыру максатыннан чыгып үткәрелде.

Дәрес барышында укучылар алдына кайда, ничек энергияне экономияләргә дигән сорау куелды.

Укучылар башта йортта нинди электр приборлары файдаланылуын санап чыктылар һәм аларда энергияне саклау  буенча үз тәкъдимнәрен әйттеләр.

Электр энергиясен экономияләүне үзеңнең гадәтләреңнән башларга кирәк. Яктыртылу  табигый һәм ясалма була.  Табигый яктылык керүне яхшыртып энергия куллануны киметеп була. Моның өчен тәрәзәләрне чиста тотарга кирәк, тәрәзә төпләрендә гөлләр яктылыкны томаларлык күп булмаска тиеш, тәрәзә каршындагы бакчада биек агачлар үстермәскә, стеналарга якты обойлар ябыштырырга яисә ачык төсләргә буярга киңәш ителә.

Кичен караңгыда ясалма  яктыртудан башка булмый. Кичен энергияне яктырту приборларын дөрес урнаштыру юлы белән экономияләп була: гомуми яктырткычларны бүлмәдә түшәм уртасына ук урнаштырырга, аерым урыннарны гына яктыртасы булганда  60-100Вт көчәнешле лампалар куярга, бүлмәдә кеше булмаганда андагы лампочкаларны сүндереп торырга, гади лампочкаларны энергия саклаучылары белән алыштырырга.

Ахырда укучыларга суыткыч, кер юу машинасы, телевизор, компьютер кебек приборларда энергияне экономияләү буенча бирем бирелде.

Шулай итеп дәрес барышында укучылар энергияне экономияләү юлларын ачыкладылар.