Шуңа да 21 декабрь көнне яңа хоккей сезонының Шәткедә башлануы гаҗәп түгел. Сүз уңаеннан шунысын да әйтеп үтәргә кирәк,  СССР заманында Бөтенроссия күләмендә үткәрелгән ярышларда җиңү яулаган әлеге команданың оешуына 2018 елда 50 ел тула. Әлеге күренекле датаны  зурлап үткәрергә ниятлибез. Бүген команданың данлы юлларын “Алмас” командасы егет-кызлары дәвам итә. Шәткедә кызлар да хоккей уйный. Бу көнне килгән кунакларга шуларның өчесен – игезәк кызлар Диана белән Лиана Җәләеваларны һәм Илфинә Миңгалиеваны  бозда хоккей уйнаганнарын күрергә насыйп булды.

Сезон ачылу уңаеннан Теләче балалар һәм спорт мәктәбе тарафыннан  оештырылган турнирда  җиде мәктәптә биш команда көч сынашты. Алар: Иске Җөри (аларга Олы Мәтәскә, Олы Мишә укучылары да кушылды), Шәтке, Теләче, Югары Кибәхуҗа, Үзәк мәктәпләре командалары. Шәтке белән Үзәк мәктәпләре командалары үткәргән тәүге уенда, тәүге алканы муниципаль район башлыгы Илдус Зарипов салды.   Яңа хоккей сезонын ачу тантанасында ул берочтан аларга уңышлы сезон һәм имин уеннар теләде, спорт белән шөгыльләнүнең, хоккей уйнауның сәламәтлеккә йогынтысы зур булуын билгеләп үтте. Әлеге ярышта Шәтке "Алмас" командасы 1 урын, Теләче командасы - 2 урын, Югары Кибәхуҗа - 3 урыннар яулады.