2022-2023 уку елы тәмамланырга да санаулы айлар калып бара. Тиздән булачак беренче сыйныф укучылары өчен тәүге кыңгырау чыңлар. Ә аңа кадәр әле барлык рәсми булган документ эшләрен, беренче сыйныфка бару турында гариза бирү һәм башка мөһим эшләрне тәмамлыйсы бар. Әлбәттә болар барысы да әти-әниләр ярдәме белән башкарыла. Мәктәпкә гариза бирү тәртибен аңлату, мәктәпнең эчке кагыйдәләре белән танышу максатыннан бүген Теләче урта мәктәбендә әти-әниләр өчен чираттагы җыелыш үтте. Аны Теләче урта мәктәбенең башлангыч сыйныфлар буенча директор урынбасары Мифтахова Венера Габдулла кызы алып барды. Ул мәктәп кагыйдәләре, беренче сыйныфка кирәкле булган уку әсбаплары белән якыннан таныштырды. Мәктәп директоры Айнур Фирдәвес улы Хафизов әти-әниләргә: “Сезнең балалар бик бәхетле, алар яңартылган спорт залы, зурайтылган ашханәсе булачак мәктәптә белем алачаклар. Шулай ук мәктәп янкормасы да беренче сентябрьга төзелеп бетеп кулланылышка тапшырылыр дип көтәбез, - дип сүз башлады. Мәктәп, биредә барган төзелеш эшләре турында тулырак сөйләде. Мәктәпкә электрон рәвештә гариза бирү тәртибе белән, милли белем бирү буенча директор урынбасары Лилия Рәис кызы Кыямова тыныштырды. Соңыннан әти-әниләрнең сорауларына җаваплар бирелде. Билгеле булганча булачак беренче сыйныф укучыларының әти-әниләреннән электрон гаризалар кабул итү, бүген 1 апрельдән эшли башлады.