Бүген, 6 март көнне,  Иске Җөри урта  гомумбелем бирү мәктәбендә, татар халкының йөзек кашы, намусы, киләчәге булган хатын- кызларыбызның милли йөзен саклап калу, гореф-гадәтләребезне, йолаларыбызны кире кайтару, телебезгә ихтирамлы мөнәсәбәт булдыру  максаты белән, “Татар кызы - 2023” бәйгесе  үткәрелде. Бәйгедә Балык Бистәсе районы  Күгәрчен урта гомумбелем бирү мәктәбеннән һәм Теләче районы мәктәпләреннән берсеннән берсе чибәр, уңган,  тапкыр гүзүл затларыбыз көч сынашты. Бәйгене Теләче муниципаль районы башкарма комитеты җитәкчесенең социаль мәсьәләләр буенча урынбасары Гиниятуллин Динар Сәет улы ачып җибәрде.  Ул барлык хатын- кызларны якынлашып килүче  Халыкара хатын – кызлар көне белән тәбрик итте, кызларыбызга уңышлар теләде.                                                                                                                   

    Бәйге “Кызларыбыз белән якыннан танышу”, “ Сорауларга җавап бирү”, “Аш – суга осталыкларын тикшерү”, “Иҗади сәләтләрен ачыклау”  дигән       4 турда уздырылды. Теләче урта мәктәбеннән әлеге бәйгедә 10нчы сыйныф укучысы Рахматуллина Диана катнашты. Диананы сәхнәдә тәкъдим итеп һәм көч биреп торучы сыйныфташлары бергәләп чыгыш ясады. Диана диплом белән бүләкләнде. Диананы конкурска татар теле һәм әдәбияты укытучылары Гарипова Ризәлә Рәүфовна, Ибраһимова Гүзәл Мәгъсүм кызы, Асадуллина Зөлфия Наил кызы әзерләде.