Бүген мәктәбебезгә Шәмәрдән поселыгында урнашкан 4 нче ЗПСО коткаручылары, (Татарстан Республикасы Гражданнар оборонасы һәм гадәттән тыш хәлләр министрлыгы каршындагы Татарстан Республикасы Эзләү-коткару хезмәте) хезмәткәрләре килде. Алар 5 “а” сыйныфы укучылары белән очрашып үз хезмәтләре белән якыннан таныштырды. Коткаручы хезмәте – нинди эш ул? Анда кемнәр эшли ала? Коткаручылар нинди вазифа башкара? Бу һәм башка сорауларга җавапларны укучылар үз хезмәтләренең осталары авызыннан ишетә алды. “Коткаручы хезмәте – бик авыр һәм җаваплы хезмәт. Без бик күп авария, янгын, суга батучыларны коткару һәм эзләү белән шөгыльләнәбез. Иң аянычы балалар үлеме. Аеруча янгында зурлар гаебе белән янып үлгән балаларны эзләү йөрәкне телә. Сез укучылар һәрвакыт сак булырга тиеш. Өйдә янган ис сизсәгез, кайдада булса, кемгә дә булса ярдәм кирәк икәнен күрсәгез, безгә шалтыратыгыз,” – диделәр коткаручылар. Алар тактага укучыларга тәүлек әйләнәсе җавап бирүче  телефон номерларын язды. “Безгә мөрәҗәгать итәргә язмасын, әмма безнең ярдәм кирәк чакта сезгә файдага булсын”, диде алар. Шулай ук кешеләрне коткарганда нинди киемнәр киеп эш итүләрен, коткару чараларын да күрсәттеләр укучыларга. “Хәзер аеруча сак булырга кирәк! Чөнки кыш җитү белән сез балалар юка боз өстендә уйнарга яратасыз. Суга кермәгез. Ялган бозга ышанмагыз, үзегезне һәм якыннарыгызны саклагыз”, - дип төгәлләде коткаручылар сүзләрен. Әлегедәй очрашулар Теләче урта мәктәбендә дәвамлы булачак.