Бу тормышта үз юлыңны табу, үзеңнең күңелеңә хуш килердәй һәм тормышыңны бәйли алырдай һөнәр сайлау иң авыр сайлауларның берсе булып торадыр. Югары сыйныфларда укый башлагач, укучылар аеруча бу турыда уйлана башлый. 2022-2023 уку елыннан Теләче урта мәктәбендә 7 “б” сыйныфы “Психология һәм педагогика класс”ы буларак эшли башлады. 8 ноябрь көнне әлеге сыйныф Теләче урта мәктәбенең укыту эшләре буенча директор урынбасары Пашина Алевтина Петровна һәм педагог-психолог Габдрахманова Зөлфия Зөфәр кызы белән,  Казан арты милли кадрлар әзерләү үзәгенә, ягъни Габудлла Тукай исемендәге Арча педагогика көллиятенә бардылар. Бирегә алар “педагог-укытучы” һөнәре белән якыннан танышу максатыннан килде. Укучыларга көллият хезмәткәрләре, укытучы һөнәренә ничек укытуларын, укытучы булу өчен нинди сыйфатларга ия булырга кирәклеген сөйләде. Төрле медиа-коммуникация чаралары белән таныштырды. Укучылар әлеге очрашудан бик күп мәгълүмат алып кайтты.