Хәзерге вакытта балаларның  сәламәт, хәрәкәтчән, җитез, өлгер булуларына зур игътибар бирелә. Чөнки күп кенә нәниләр абый-апаларына ияреп, һаман телевизор, компьтер тирәсендә кайнаша. Балаларның  күбесе сәламәтлекнең  иң зур байлык икәнен аңлап та бетерми. Лесной балалар бакчасында бүген тәрбияче “Сәламәт булыйм дисәң...” дигән темага әңгәмә алып барды. Ул балаларга физик яктан ничек үзеңне ныгытырга- өлгер, җитез булырга, авыруларга ничек каршы торырга икәнен аңлатты. Тышта салкын, тиздән озын бәйрәм яллары башлана.  Тәрбияче балаларга шушы вакытларда саф һавада ничек  ял итәргә, чана шуганда үзеңне ничек тотарга кирәклеген өйрәтте. “Сәламәтлекне акчага сатып алып булмый, авырта башлаганчы ук үзеңне саклый белергә кирәк”- дип тәмамлады сүзен  тәрбияче. Балаларга әңгәмә бик ошады.