Халыкара  хатын – кызлар көне уңаеннан Теләченең беренче номерлы балалар бакчасында да  8 март  көненә багышланган чаралар уза. Традицион бәйрәмнәр белән беррәттән педагоглар  традицион булмаган алымнар белән бәйрәмнәрне төрләндереп торалар. Мәктәпкә әзерлек төркемендә әниләр көне быел квест - уен форматында узды. Әниләр берничә төркемгә бүленеп үзләренең белемнәрен тулыландырдылар:“Алдынгылар хәрәкәте” кызлары Әдилә белән Динә бәйрәмгә килгән әниләр һәм балаларның сәламәтләкләрен ныгыттылар. “Минем шәҗәрәм- минем горурлыгым” тукталашында бакча мөдире Алисә Дәүләтшина белән нәсел җепләрен барладылар. Мәктәпкә әзерлек төркеме тәрбиячесе Гөлшат Муликова квестчыларны кул эшләре серләренә өйрәтте. Инглиз теле укытычысы Гөлназ Фәләхиева белән инглизчә башваткыч чиштеләр һәм туган телнең нинди мөһим икәнлегенә төшенделәр. Теләченең 35 еллык юбилее уңаеннан якташыбыз Юныс Әхмәтҗановның “ Татар халык ашлары”китабындагыча бергәләп кыстыбый пешереп сыйландылар. Кыстыбый пешерүне  татар теле тәрбиячесе Ләйсән Сабирҗанова оештырды. Соңыннан Теләче турында  белемнәрен балалар да әниләр дә ныгыттылар, бәйрәм җырлары җырлап, биеп күңелләрен күтәрделәр.