Макулатура җыю – урманнарның, туган җиребезнең, ахыр чиктә планетабызның табигый матурлыгын саклау гына түгел. Кәгазь калдыклары җыю ул әле сакчыллык та, хезмәт тәрбиясе дә. Бу эшкә һәркем үз өлешен кертә ала. 
 Макулатураны Теләченең беренче номерлы балалар бакчасында ел дәвамында берничә тапкыр җыябыз. Бу чара инде безнең традициягә әйләнде. Балалар да, әти-әниләр дә әлеге чарага актив катнаша. Һәр акциядән соң нәтиҗә ясап, актив балаларны билгелибез, аларга рәхмәт хатлары тапшырабыз.

Макулатура куллану агачларны кисүдән саклый. Макулатураны яңа кәгазь, төрле кәгазь әйберләр һәм хәтта кайбер төзелеш материаллары җитештерү өчен кулланырга мөмкин.    Бакчабызда  макулатура җыю эше тәрбияләнүчеләребездә һәм аларның ата-аналарында экологик культура формалашуына  нигез салды   дип ышанабыз. Яңа буын экологик яктан грамоталы булып  үсәр һәм көндәлек тормышта чүп-чарны аерым җыю аның өчен норма булачак дип ышанасы килә.