"Пешекче – артист ул, кунакның, безнең очракта һәр баланың күңелен табу өчен, аңа нәкъ сәхнәдәгечә сәнгать остасы булырга туры килә. Йөзеңдә һәрчак елмаю булсын. Усалланып йөрүче кеше тәмле аш пешерә белми ул. Пешекче – табиб. Аңа кешеләрнең сәламәтлеге тапшырылган. Пешекче – рәссам. Аның ашы тәмле генә түгел, бик матур да булырга тиеш. Пешекче философ та, педагог та, сәгатьләр буе утлы плитә янында торучы металлург та"- ди танылган аш – су остасы Юныс Әхмәтҗанов.
Безнең Теләченең беренче номерлы балалар бакчасы пешекчеләре дә югарыда санап киткән барлык сыйфатларга ия. Алай гына да түгел, бөтен күңел җылыңны биреп иҗат иткән ашларны балаларга, кешеләргә тәкъдим итү өчен әле кыюлык та , гаҗәеп күп санлы рецептларны башыңда тоту өчен яхшы хәтер дә , ризыкның тәмен белеп-татып карау осталыгы да һәм физик яктан чыдамлык та сорала, чөнки аш пешерүчеләр көне буе аяк өстендә.
Пешекчеләребезнең эшчәнлеген күзәтеп, эш тәртипләрен өйрәнгәннән соң, бүгенге заман балалар бакчасы пешекчесе нәкъ Зөлфия белән Эльмира апалар кебек булырга тиеш дигән нәтиҗәгә килдек.
Алар 25 апрель көнне "Балалар бакчасында иң яхшы пешекче" бәйгесендә катнаштылар һәм үзләренең иң яхшы пешекче икәнлекләрен исбатлап күрсәттеләр. Әлеге җиңүләре белән хезмәттәшләребезне чын күңелдән котлыйбыз! Балаларның һәм әти-әниләрнең рәхмәт сүзләрен ишетеп озак еллар дәвамында эшләргә язсын!