Лагерьның бүгенге көне дә гадәттәгечә иртәнге зарядкадан башланып китте. Линейкада ял итүчеләр көн тәртибе белән таныштылар. Иртәнге аштан соң балалар өчен милли һәм күңелле бәйрәм- Сабантуй бәйрәме үткәрелде. Әлеге бәйрәм балаларны халкыбызның гореф-гадәтләре белән таныштыру, үзара дуслашу һәм берләштерү, милли спорт уеннарына кызыксыну уяту максатыннан оештырылды. Озак та көттермичә бәйрәмебез башланып китте. Балалар музыка яңгырап торган спорт мәйданчыгына уздылар.   Программада "Чүлмәк вату", "Капчык киеп йөгерү", "Бүләкләр кисү", "Чиләк-көянтә белән су ташу", "Кашыкка йомырка куеп йөгерү", "Катыктан акча эзләү", "Аркан тарту" һәм "Көрәш" кебек уеннар бар иде. Балалар һәр уенда бик теләп катнаштылар, Бәйрәмдә бер бала да бүләксез калмады. Барысы да истәлекле бүләкләр һәм татлы призлар белән бүләкләнделәр. Бүгенге бәйрәм балалар күңелендә озак сакланыр дигән теләктә калабыз.