Лагерьның җиденче көне кояшлы иртә һәм балаларның шат авазлары белән башланып китте. Иртәнге гимнастикадан соң "Умыртка баганасының дөрес формалашуы һәм сәламәтлек"дип исемләнгән призентация карадылар, дөрес утырып уку, язу; матур һә төз йөреш кагыйдәләрен искә төшерделәр. Иртәнге аштан соң ял итүчеләр мәдәният йорты хезмәткәре Хәйруллина Л.Ш. белән очрашты. Ләйсән апалары балаларга театр сәнгате, музыка, бию төрләре турында сөйләде, балаларны кызыксындырган барлык сорауларга җавап бирде. 7нче сыйныф укучысы Хәйруллина Нәзирә балаларга фин биюе элементларын күрсәтте, бергәләп биюне өйрәнә дә башладылар. Төшке аштан соң, дару үләннәре атамаларын искә төшерү максатыннан җәйге аланга сәяхәткә чыктылар. Балалар кошлар сайравын тыңладылар, табигатьтәге үзгәрешләрне күзәттеләр, дару үләннәрен барладылар. Сәяхәтебез кызыклы һәм файдалы булды.