26 нчы февраль көнне мәктәптә «Батырларның даны мәңгелек» дип аталган әдәби-музыкаль кичә үтте. Кичә Бөек ватан сугышында һәлак булган шагыйрьләргә һәм язучыларга, Чечня һәм Әфганстан җирләрендә һәлак булучы батырларга, булачак ил сакчыларына багышланды. Укучылар сугыш турында шигырьләр укыдылар, җырлар җырладылар, әкиятләрдән өзекләр сәхнәләштерделәр. Укытучыларыбыз Лилия Газизовна һәм Зөлфия Әнвәровна башкарган җырлардан соң залдагы барлык тамашачыларның да күзләрендә яшь иде, алар башкарган җырлар аларны яңадан шул дәверләргә кайтарган кебек булды. Кичәбезнең икенче өлешендә башлангыч сыйныф укучылары укытучылары белән бергә әзерләгән әкиятләрдән өзекләр сәхнәләштерделәр. Залда утыручыларга «Койрыклар», «Куян кызы», «Сертотмас үрдәк» әсәрләре бик ошады, кечкенәләр геройларга көч биреп, геройлар белән бергә сәяхәт итеп чын күңелдән шатланып утырды. Кичә ахырында милли эшләр буенча директор урынбасары Фәизова Фирая Сафовна һәм методик берләшмә җитәкчесе Рәхимова Мөнирә Саматовна кичәдә катнашкан укучыларга Мактау кәгазьләре тапшырдылар, илебезгә тыныч тормыш бүләк иткән ветераннарның  кадерен белеп, аларны хөрмәтләп яшәргә кирәклеген искә төшерделәр. Кичәне алып барган укытучыларыбыз Вәлиева Зөлфия Җәлиловнага һәм Гарифуллина Лилия Газизовнага рәхмәтләрен белдерделәр.