8-10 нчы ноябрь көннәрендә дөньякүләм “Татарча диктант” белем тикшерү акциясе уздырылды. Быел ул 9 нчы тапкыр оештырыла. Акциянең төп максаты - татар теленә, мәдәниятенә игътибар җәлеп итү, дөнья буенча таралып яшәгән татарларны берләштерү, әдәби телдә дөрес сөйләм, дөрес язу күнекмәләрен үстерү, татар телен кулланучыларның даирәсен арттыру һәм татар теленә карата мәхәббәт уяту.

149 нчы лицей ел саен әлеге акциядә актив катнаша. Быел да 8 нче ноябрь көнне 70кә якын кеше диктант язды. Ш.Камалның “Матур туганда” романыннан өзек тәкъдим ителде. Диктант язарга татар теленяраткан, аның язмышы өчен җанатып торучылар җыелган иде. Катнашучыларны яшь ягыннан караганда, иң кечесенә – 14 яшь, иң өлкәненә 59 яшь иде. Диктант тыныч, уңайлы мохиттә узды. Эшләр искиткеч матур почерклар белән язылган. Мондый чаралар яшь буында гына түгел, киң җәмәгатьчелектә дә телебезгә карата уңай мөнәсәбәт, кызыксыну, тел сагында торуга омтылыш уяту да бик зур әһәмияткә ия.