11-14 нче март көннәрендә Казанда “Ел Укытучысы – 2019” бәйгесенең йомгаклау этабы узды. Чит төбәкләрдән (Мордовия, Чувашия, Башкортстан, Марий Эль республикаларыннан; Киров, Пермь, Пенза, Оренбург, Төмән, Ульян, Новосибирск өлкәләреннән) килгән татар теле һәм әдәбияты укытучылары 149 нчы лицей  базасында көч сынаштылар – һөнәри осталыкларын күрсәттеләр. “Иң яхшы татар теле һәм әдәбияты укытучысы” исеменә лаек булу өчен, укытучылар  биш сынау: дәрес, сыйныфтан тыш чара, мастер класс үткәрделәр, белем проекты якладылар, педсовет утырышында катнаштылар. Искиткеч матур дәресләр, сыйныфтан тыш чаралар, мастер класслар күрсәтеп, чит төбәкләрдәге татар теле укытучылары балаларга туган телне өйрәтүгә, аларга үз телләрендә белем һәм тәрбия бирүгә бөтен көчләрен куеп  эшләүләрен, үз эшләренең чын осталары булуларын расладылар. Катнашучылар лицеебыз укучыларының белемнәрен, татар телендә иркен аралашуларын югары бәяләделәр һәм укучыларыбызга чиксез рәхмәтләрен җиткерделәр. Чыннан да, дәреснең уңышлы үтүе укучыларның белемнәреннән, актив катнашуларыннан тора бит. Афәрин, балалар!