26 нчы июнь көнне  чыгарылыш сыйныф укучылары өчен Чыгарылыш кичәсе – бал  үткәрелде.

  Чыннан да бу көн әкияти дөньядан укып белгән бал кичәләрен хәтерләтте. Кызлар-егетләр гүя аллы-гөлле чәчкәләр сыман, ә яшьлек исә – гомернең үзе бер гүзәл чоры.

Чыгарылыш сыйныф укучыларын  дулкынландыргыч  мизгелләргә тулы булган әлеге кичәгә котларга дип район мәгариф бүлеге җитәкчесе урынбасары Зинннәтуллина Дания Ясировна, Яшьләр эшләре һәм спорт буенча бүлек мөдире урынбасары Кубиев Илдар Исмагилович, район мәдәният йорты  җитәкчесе Рәфәт Ахиярович килгәннәр  иде.

Мәктәп директоры Госманова Эльвира Зуфаровна   чыгарылыш сыйныф укучыларын тәбрикләп, иң белемле укучы - Сәхипова Гөлназга  алтын  медаль тапшырды.

-Әле кайчан гына сез мәктәп бусагаларын атлап,  1нче  сыйныфка укырга килгән идегез. Инде менә вакыт сизелми дә үтеп китте. Шушы мәктәпләр белән саубуллашыр чагыгыз җитте. Алда сезне олы тормыш юллары, шул ук вакытта мәктәп тормышыннан кызыклыгы һәм файлалы ягы белән  бер дә калышмаган киләчәк көтә. Ә аны нинди итеп күрү сезнең һәркайсыгызның үз кулында. Кая гына гына барсагыз да, кайда гына яшәсәгез дә, сезне уңышлар көтеп торсын. Шул ук вакытта олы белемнәр, максатлар, алдынгы карашлар тупланган уй-фикерләрегез белән без сезне көтеп калачакбыз.  Районның данын, киләчәген үстерү сезнең кулларда. Уңышлар сезгә, -дип белдерде Эльвира Зуфаровна   үзенең чыгышында.

Кичә барышында шулай ук, чыгарылыш сыйныф укучыларыннан тыш , башка укучыларның да ел дәвамында ирешкән уңышлары телгә алынды, олимпиадада  җиңүчеләр, төрле бәйгеләрдә, спорт өлкәсендә җиңү яулаучылар сәхнәгә күтәрелеп,  җитәкчеләр кулыннан Мактау грамоталары, бүләкләр алдылар.  

Чыгарылыш кичәсе укучыларның үзләренең, әти-әниләрнең чыгышларына, видеороликларга  да бик бай иде. Алар укучылар башкаруында концерт  номерлары белән үрелеп барып, күңелләрдә истә калырлык мизгелләр тудырдылар.