17 нче  май көнне  Җәлил бистәсендә "ТАТМЕДИА" җәмгыятенең "Чын мирас" журналы редакциясе, Казан федераль университеты Идел буе төбәкара мәгариф хезмәткәрләренең квалификациясен күтәрү һәм яңадан әзерләү үзәге, Сарман муниципаль районы башкарма комитеты мәгариф идарәсе, икенче санлы Җәлил урта мәктәбе тарафыннан  филология фәннәре докторы, профессор Хатыйп Миңнегуловның 75 яшьлек юбилее уңаеннан уздырылган”Гасырлар өнен тыңлап” дигән республика фәнни – гамәли конференция  уздырылды. Конференциянең беренче өлеше Республикабызның күренекле шәхесләрен каршы алу белән башланып китте. Алар арасында Хатыйп Миңнегулов, Ләбиб Лерон, Рәдиф Гаташ, Гамирҗан Дәүләтшин һәм башка кунаклар да бар иде. Ә инде икенче өлешендә республиканың төрле районнарыннан килгән укытучылар һәм укучылар, төрле секцияләргә бүленеп, үзләренең фәнни эшләрен тәкъдим иттеләр. Алар арасында “ Сарман урта гомумбелем бирү мәктәбе”нең  4 нче сыйныф укучысы Мәхмүтова Алина (укытучысы – Салихова Нурия Миргасыйм кызы), 10 нчы сыйныф укучысы Салемгараева Гүзәлия (укытучысы  - Хатипова Гөлназ Рафис кызы) да бар иде. Алар үзләренең эшләрен якладылар. Алина Мәхмүтова “ Дамир Гарифуллинның балалар өчен язган шигырьләренә анализ” дигән эше белән, Салемгараева Гүзәлия “ Х. Миңнегуловның педагогик һәм методик эшчәнлеге” дигән эше белән уңышлы чыгыш ясап, икесе дә икенче дәрәҗәле диплом белән бүләкләнделәр. Конференция бик күңелле һәм җанлы үтте.