2014 нче елның 20 нче мартында Әлмәт дәүләт муниципаль хезмәт институтында укучыларга  Клара Булатова исемендәге премияне тапшыру тантанасы  булды. Әлеге вакыйганың бу институтта үтүе очраклы гына түгел – Клара Булатова озак еллар әлеге уку йортында мөгаллимлек иткән укытучы. Исемле бүләк поэзия, проза һәм драматургия жанрында иҗат итүче,  авторның сүзләренә язылган җырларны башкаручы, шагыйрәнең иҗатын фәнни өйрәнгән студентларга һәм мәктәп укучыларына тапшырылды. Быел башка еллардан аермалы буларак,  иҗади хезмәтләр 400 дән артып киткән. Үзе исән чакта ук исеме чишмә атамасы һәм премия белән мәңгеләштерелгән шәхес ул Татарстанның атказанган мәдәният хезмәткәре, Рафаил Төхфәтуллин премиясе лауреаты, танылган шагыйрә һәм укытучы Клара Булатова. Гомерен яшь буынга белем һәм тәрбия бирүгә багышлаучы буларак та ул моңа лаек. Юкка гына ул үзе дә: “Яңадан яратылсам, укытучы булып туар идем дә, шагыйрә булып яшәр идем”, – дими.

  Конкурска безнең мәктәптән Зыятдинов Альмир (10 нчы класс) һәм Афанасьева Эльвира(11 нче класс) үзләре иҗат иткән шигырьләре белән катнаштылар һәм диплом белән бүләкләнделәр. Ә 8 нче б сыйныфы укучысы Фазуллина Гүзәл  К.Булатованың “Шушы яктан, шушы туфрактан без” җырын башкарып, лауреат дипломы алды. Афәрин, Гүзәл! Алга таба иҗат уңышлары сиңа!