Аделя безнең газетага да интервью бирде:

     - Бәйге өч этапта уза һәм һәркайсында  районнан өчәр укучы бүләкләнә. Мин, анын икенче этабында иң күп баллар җыючыларның берсе булып, iPad планшеты белән бүләкләндем. Безне Яр Чаллы шәһәрендәге балалар һәм яшьләр иҗат сараенда тантаналы шартларда бүләкләделәр. Беренче урыннарны алучыларга – зур планшетлар, икенче, өченче урыннарга кечерәкләрне һәм барыбызга да футболкалар бирделәр. Мин бәйгедә ул игълан ителгәннән бирле катнашам. Беренче этабы 1 марттан уку елы тәмамланганчы барган иде, икенче этабы яңа уку елы башлануга бетте. Хэзер өченче этабы бара. Ул ел ахырына кадәр барачак. Мин бу бәйгене укучылар әти-әниләрен, туганнарын шәхси кабинетлардан файдаланырга, түләүләрне электрон рәвештә башкарырга өйрәтсеннәр өчен уйлап чыгарылган, дип аңлыйм. Минем әти-әни үзләре дә Интернетта шәп “йөзәләр”. Минем бәйгедә катнашырга
теләгем барлыгын белгәч, дүрт куллап хупладылар. Торак-коммуналь хезмәтләре, телефон, апаемны балалар бакчасына йөрткән өчен, алай-болай әти-әнигә рульдә юлда кагыйдә бозган өчен штраф салсалар, аларны, кыскасы, барлык түләүләрне өйдән чыкмыйча гына, хезмәт хакы ала торган карта аша түлибез. Хәзер бит һәр укучының электрон көндәлеге бар. Мин edu.tatar.ru сайты һәм муниципаль хезмәтләр порталы аша әти-әни, туганнар белән бәйләнештә торам. Түләгән һәр квитанция өчен баллар өстәлә бара. Мин 159 балл җыйдым. Шәһәрләрдән килгән бүләкләнүчеләр арасында меңәр балл җыючылар да бар иде. Безнең районнан беренче-икенче урыннарны алучылар – Җәлил бистәсе укучылары. Минем җиңүчеләр арасында булуымны, Чаллыга барырга ун көнләп кала, завуч Резедә Рашитовна һәм информатика укытучысы Айрат Рифович әйттеләр. Чаллыдан кайткач, мәктәптә  линейкада котлану тагы да куанычлырак булды!. Планшет бик уңайлы әйбер: теләсә кайдан Интернетка кереп, Skype аша сөйләшеп була, көчле фотоаппараты, видеокамерасы бар. Гел интернетта икән, дип уйламагыз. Укуым әйбәт, спорт белән шөгыльләнәм. Икенче сыйныфтан бирле Данияр Дөлфәтович җитәкләгән баскетбол түгәрәгенә йөрим, узган уку елында, командабыз республикада беренче урынны алды. Мәктәпкә кубок алып кайттык. Бәйгедә исә алга таба да катнашам һәм башкаларны да кушылырга чакырам.

Салихова Аделя, 8а сыйныфы укучысы