Бүген, 18 нче февраль көнне Сарман урта мәктәбендә якташыбыз, татар халык җырчысы Илһам Шакировка багышланган кызыклы очрашу үтте. Кунакта түбәндәндәге шәхесләр булып узды: Шакиров Флүр Кыяметдин улы – Илһам Шакировның бертуганының улы, И.Шакиров исемендәге I республика премиясенең "Халыкчан җыр" номинациясе лауреаты һәм үзешчән артист; шулай ук Хаҗиев Илһам Муллый улы – И. Шакировның ярдәмчесе, иң якын дусты, аны тәрбияләүче, аның җырларын пропагандалаучы кеше; һәм дә якташ язучыбыз Аяз Гыйләҗевнең улы - Гыйләҗев Мансур Аяз улы – язучы, драматург, киносценарийлар авторы, Татарстан Язучылар берлеге әгъзасы.
Алар мәктәп тарихы, музей, укучыларның һәм укытучыларның эшчәнлеге, мәктәп тормышы белән таныштылар. Аннан соң түгәрәк өстәл янында укучыларны кызыксындырган сорауларга җавап бирделәр. Кунаклар Илһам абый турында үзләренең кызыклы хатирәрәләре белән уртаклаштылар. Азакта, бергәләшеп, җырчының Дамир Гарифуллин сүзләренә иҗат ителгән “Чыгарсыңмы каршы алырга?” (“Сарман вальсы”) җырын башкардылар.