Мәктәптә  Сарман районы татар теле һәм  әдәбияты укытучыларының  куст методик берләшмә утырышы булды. Анда район мәктәпләре укытучылары катнашты. 5 нче А сыйныфында укытучы Раушания  Рамазанова, 5 нче Б сыйныфында укытучы Фәнүзә Сәгыйровна, 6 нчы А сыйныфында укытучы Резедә Мөхлиева ачык дәрес үткәрде. Дәресләр уеннар белән үрелеп барды. Укучыларның сөйләм телен үстерү өстендә эш төрләре кулланылды. Үткәрелгән һәр ачык дәрестә дә заманча технологияләр кулланылды, төрле презентацияләр куллану дәресләрне тагын да җанландырды.

   Туган якка багышланган “Безнең яклар кебек матур җирләр булса булыр бары меңгә бер” дип исемләнгән музыкаль кичә дә һәммәсенең күңеленә хуш килде. Музыкаль кичәне алып баручы IX сыйныф укучылары Эльвина Төхбатуллина  һәм Булат Фатихов сәнгатьле, ачык сөйләүләре белән аерылып торды.

    Берләшмәнең өченче өлеше дәресләргә үзанализ һәм анализ ясау белән дәвам итте. Килгән кунаклар да үзләренең фикерләрен, җылы сүзләрен әйтеп укытучыларыбызны куандырды. Методик үзәк методисты Шәйхразиева Гүзәл Ринатовна да үз өстәмәләрен кертте.

     Республикабыз мәктәпләрендә белем алган һәм 9 нчы сыйныфны тәмамлаган  укучылар татар теленнән имтиханны дәүләт йомгаклау аттестациясе формасында тапшыра алалар.  Эш барышында  татар теле һәм әдәбияты укытучылары бу турыда файдалы мәгълүмат алдылар.

      Методик үзәк методисты Гүзәл Ринатовна укытучыларыбызның  һәр яктан да тырыш, бер-берсенә ярдәмчел булуларын ассызыклады. Берләшмәнең соңгы өлешендә, берләшмә утырышына йомгак ясап, киләчәктә дә шундый матур, эчтәлекле дәресләр оештырылсын, дигән фикерен җиткерде, укытучыларга иҗади уңышлар теләде.

Рамазанова Раушания Наилевна, татар теле укытучысы