17 нче гыйнварда якташ язучыбыз Аяз Гыйләҗевнең тууына 85 ел булды. Шул уңайдан Сарман урта мәктәбендә “Аяз Гыйләҗев – безнең горурлыгыбыз” дип исемләнгән әдәби - музыкаль кичә узды. Кичәдә 8 нче б сыйныфы укучылары бик актив катнашты. Алар Аяз Гыйләҗевнең тормыш юлы, гаиләсе, иҗади эшчәнлеге турында сөйләделәр, презентацияләр күрсәттеләр. Шулай ук укучылар Аяз Гыйләҗевнең әсәрләренә карата язылган шигырьләрне яттан укыдылар, спектакльләрдән өзекләр күрсәттеләр, язучы белән бәйле кайбер истәлекле моментларга тукталдылар. Кичә бик күңелле, җанлы үтте. Һәркемнең күңелендә җылы хисләр, уңай тәэсир калдырды.

       Аяз Гыйләҗев – татарның әдәби мирасына зур өлеш керткән, әдәбиятыбыз тарихында тирән эз калдырган олпат язучыларыбызның берсе. Аның әсәрләренең тәрбияви кыйммәте әйтеп бетергесез зур. Алар – безнең милләтебезнең рухи байлыгы, милли үзенчәлекләре турында чорыбыз вакыйгаларына бәйләп язып калдырган әсәрләр. Безнең чор кешеләренең яшәү рәвешләрен киләчәк буыннарга да алып бару вазифасы йөкләнгән аларга. Аяз Гыйләҗев – татар милләтенең горурлыгы!