Бүген 5 декабрь көнне Иске Минзәләбаш авылында олы вакыйга булды. Бу авылның урта гомуми белем бирү мәктәбенә А. Тимергалин исеме бирелү уңаеннан мемориаль тактаны ачу тантанасы үтте.  Аны Адлер абый Тимергалинның улы – Рөстәм Тимергалин һәм кызы Алсу Йосыпова (Тимергалина) башкарды. Тантанада бик күп кунаклар: Татарстан Республикасы дәүләт советы депутаты Газизов Генар Янбакович, язучылар союзы мәтбугат хезмәткәре Рифат Сәләк, “Түгәрәк уен” альманахының баш редакторы Илсияр Иксанова , аның урынбасары Гөлсинә Хамидуллина, Татарстан китап нәшрияты редакторы Рәмзия Шакирова, Сарман муниципаль районы советының аппарат җитәкчесе Фәндәс Анасович Валиев, Сарман муниципаль районы мәгариф бүлеге җитәкчесе урынбасары Габидуллин Газинур Азгатович катнашты, авыл халкы  да читтә калмады. Килгән һәрбер кешегә А. Тимергалинның “Юл чатында” дигән китабы таратылды. Мемориаль тактаны ачу тантанасы мәктәп ишек алдында үтте, аннан соң Адлер Тимергалинның балалары, туганнары, каләмдәшләре, авылдашлары, аны белгән күренекле шәхесләр танылган фантаст язучы турында якты истәлекләре белән уртаклаштылар. Барлык килгән кунакларның, авылдашларның аш табыны артында да сөйләшер сүзләре күп булды. Бу тантанада катнашкан барлык кеше үзенә рухи азык алып кайтып китте.