МБГББУ «Сарман гимназиясе” күркәм эшләре белән районыбыз кешеләренә билгеле. Бу уку елын да ул ата-аналар белән тыгыз элемтәне булдырудан башлады. Шул уңай белән гимназиядә 13.09 (башлангыч сыйныфлар өчен), 14.09 (5-8 нче сыйныфлар өчен), 15.09 (9-11 нче сыйныфлар өчен) көннәренә ата-аналар җыелышы планлаштырылган. Кичә инде башлангыч сыйныф укучыларының ата-аналары беренче киңәшмәгә җыелдылар. Анда гимназиябез директоры Л.Х.Шамилова мәктәп кагыйдәләре, ашханәдә 2 тапкыр кайнар ризык белән туклану һәм башка мөһим мәсьәләләргә тукталды. Гимназиябезнең шәфкать туташы Шәкүрова А. гриппка каршы прививка ясатуның әһәмияте, психолог Галялиева В.Н. “Уку алдынгысын ничек тәрбияләргә?”, башлангыч сыйныф укытучылары Нафикова А.Я. “Укучыларда уку күнекмәләре булдыру”, Таҗетдинова Р.И. “Сәләтне ничек ачарга?”, Һадиуллина Г.А. “Гаиләдә - дидактик уеннар” темаларына чыгыш ясадылар. Тәүге җыелыш бик эшлекле үтте, ата-аналарның сорауларына җавап бирелде, тәкъдимнәр тыңланды. Мәктәп белән гаиләнең элемтәсен һәрдаим тыгыз алып барган очракта гына уңышка ирешеп була.