Һәр милләттә исеме телгә алынуга ук ихтирам уята торган шәхесләр була. Муса Җәлил әнә шундый исемнәрнең берсе. Юк, ул исем генә түгел, бәлки тирән мәгънәле символ да. Чөнки бу исемнең синонимнары булып батырлык, кыюлык, каһарманлык, талантлылык, тугрылык, фидакарьлек кебек сүзләр тора. Ул, чыннан да, бу сүзләрнең һәммәсенә лаек кеше. Муса Җәлил, чын мәгънәсендә халкыбызның бөек шәхесе, горурлыгы. Муса Җәлил турындагы белемнәребезне авылыбыз китапханәчесе Раупова И.Г. тагын да баетты. Ул Муса Җәлил язган шигырьләрнең төп тематикасы азатлык, Ватанга мәхәббәт, сөйгән ярга мәхәббәт, сугыш елларында кеше язмышы турында икәнен әйтеп үтте. Сәнгатьле итеп герой шагыйребезнең шигырьләрен укып күрсәтте. Китапханәдә Муса Җәлилгә багышлап китап күргәзмәсе дә оештырылган. Әлеге китаплар аша татар халкының каһарманы Муса Җәлилнең иҗаты, тормыш юлы белән танышырга мөмкин. Китапханәгә рәхим итегез!