Көзнең явымлы, салкынча көннәре башлану белән тын юллары авырулары, төчкерүче-йөткерүчеләр саны арта, грипп баш калкыта. Грипп социаль әһәмияте ягыннан йогышлы авырулар арасында беренче урында тора. Ә йогышлы авырулар төрле катлаулануларга, күңелсез хәлләргә китерергә мөмкин. Шуңа күрә дә соңгы елларда гриппка каршы вакцинация үткәрүгә зур игътибар бирелә. Грипп - балаларны да, олыларны да аямый торган йогышлы авыру. Аннан саклануның иң ышанычлы юлы - гриппка каршы вакцина ясату. Аны ясату алдыннан бернинди әзерлек кирәкми, бары тик вакцинация ясатканга кадәр кешенең ике атна кала салкын тиеп авырмаган булуы шарт. Безнең мәктәп коллективы һәм укучылары, әти-әниләр гриппка каршы вакцинацияләүгә бик җаваплы карыйлар. Шушы көннәрдә авылыбыз фельдшеры Лукманова Г.Н. укытучыларга, хезмәткәрләргә, укучыларга гриппка каршы вакцинация үткәрде. Балаларга һәм укучыларга прививка ясау алдыннан әти-әниләрдән язмача рөхсәт алынды. Сәламәт булыйк!